陶大宇願為陳總翻閹

[align=center][img=400,600]http://simg.sina.com.hk/cp/0/0072/7727/2/p.jpg[/img][/align][align=center]林文龍與太太郭可盈前晚出席活動時紛紛被問「回巢」的可能性。[/align][align=center][img=449,600]http://simg.sina.com.hk/cp/0/0072/7728/2/p.jpg[/img][/align][align=center]王維基昨日嘲無綫「變陣」冇用。[/align]【東方日報專訊】有指無綫打造的百億電視王國「危危乎」，一眾高層即急謀對策，據知陳志雲已碌爆人情卡，斟洽昔日的「TVBuddy」回巢，務求挽救弱勢收視；曾與無綫鬧合約糾紛的「師奶殺手」陶大宇揚言「蝕底啲都幫」，加上陳總重掌大旗，難怪一眾重磅舊將亦心郁郁有望回巢！
無綫備受內憂外患困擾，先有不少一線演員離巢，最近又傳「電訊魔童」王維基的城巿電訊高薪挖走一眾幕後大軍，令電視王國陣腳大亂！有見及此，一眾高層紛紛出招救亡，據知深得下屬尊重的陳志雲亦碌爆人情卡，邀請一班昔日創下收視高峰的「TVBuddy」（TVB之友）回巢，勢令無綫再度劇力萬鈞！

唔介意蝕底啲都幫
曾兩度離巢的陶大宇，90年代憑《壹號皇庭》及《刑事偵緝檔案》系列成為「師奶殺手」，毅然轉往內地發展的他，雖自認奄尖，但仍不介意無綫「翻閹」，只望磋商時減少「沙石」：「之前同無綫傾約嗰陣唔順利，所以先停一停！我暫時都仲有條件選擇工作。」談到舊東家遭「挖角」？他寄語無綫該重審制度：「點秤無綫畀錢都唔會高過出面，但都希望提供啲舒服嘅條件畀藝人。開心嘅話大家都想返呢個大家庭做，就算條件稍為公平啲，都唔介意蝕底啲都幫！」回想昔日主演的劇集收視爆燈，問到大宇現在有否感心噏？他直言對無綫已冇感覺：「一直唔相信不死神話！但都希望有緣返去拍劇。」09年離巢時與高層為劇集酬金鬧不快的他，雖堅拒「回水」換新約，但在「陳總效應」下，他仍樂意重返無綫。
至於前晚與老婆郭可盈出席活動的林文龍，亦默認TVB孤寒，但直言對舊公司仍有感情：「呢個都唔係一個咩秘密，TVB都話自己出價比市價偏低！（再拍劇揀錢定睇感情？）感情一定有，但錢當然都係一個原因！（嚟緊更多電視台？）係好事，百花齊放先精彩同進步。」而郭可盈表示因要照顧囡囡，故目前「主打」拍廣告及活動，拍劇的「重擔」交由老公負責。

王維基續打落水狗
另一邊廂，城巿電訊主席王維基昨日出席活動時繼續「棒打落水狗」，他坦承逾30名頂尖編審、編劇與逾20名監製及導演已落實加盟，但拒透露有否斟洽一線花旦小生佘詩曼、馬德鐘及林保怡過檔。雖然他否認減少抽佣「吸星」，仍暗寸無綫人工低，更嘲無綫「變陣」冇用：「據我所知冇一個肯留低，嗰啲編劇訓練班開得嚟都蚊瞓！」此外，昨晚有網友在王維基微博留言撐無綫「獨大」，他隨即留言強調香港人應有「更多」選擇。