2009-12-28 13:39
meta
舊愛上台獻花心甜 Sammi安仔唱情歌萬人起哄
鄭秀文（ Sammi）和許志安分手 5年，前晚安仔擔任 Sammi演唱會嘉賓大唱兩人飲歌，他更送上 12支寓意我愛你的火紅玫瑰給 Sammi大玩恩愛，其間 Sammi表現含羞答答更不時情深望向安仔，甚有憑歌寄意與安仔餘情未了的意味，過萬觀眾即時尖聲狂叫。
合共 10場的鄭秀文演唱會前晚繼續在紅館舉行，全場爆滿加上 boxing day，觀眾氣氛熱烈。繼劉德華、鄭伊健及葛民輝三位猛男後，前晚 Sammi請來前男友許志安擔任嘉賓，安仔出場前 Sammi笑說：「飲啖水先，以下落嚟呢首歌我已經 N年冇唱過。」安仔甫出現全場哄動，過萬觀眾的尖叫聲震耳欲聾，氣氛高漲。
送上 12支紅玫瑰
安仔把手上 12支火紅玫瑰送給 Sammi， Sammi收下時不自覺露出甜笑，接着兩人合唱經典飲歌《其實你心裡有沒有我》， Sammi鬼馬地把原來的歌詞「是我愛你太多」改為「是我愛佢太多」，觀眾聽到即大聲歡呼，其間安仔搭着 Sammi膊頭及扶着她的腰，一切盡在不言中。
Sammi又擔心安仔忘記歌詞，嬌嗲地說：「嗱，歌詞呀！」安仔則笑稱：「我熟過你呀隻歌！」當 Sammi唱到最後一句「其實你心裡有沒有我」時，更露出一副懷春冧樣，甚至眼神不敢直望安仔，最後更联着脷草草唱完，並打圓場說：「唔好搞咁耐，紮花好重。」明顯 Sammi遇見舊愛難免心如鹿撞。
之後 Sammi和安仔在台上繼續打情罵俏， Sammi笑問：「點解你矮咗嘅？」安仔說：「咩鞋嚟 o架，成 10吋高，講真我真係好開心。我第一晚嚟睇你，因為我知道你會着呢件衫，所以買玫瑰嚟襯你。」 Sammi下台時，安仔即肉緊地叫穿高踭鞋的 Sammi小心。
安仔：佢好特別
安仔乘 Sammi落台換衫的空檔，感性地分享心聲：「佢真係好特別，我覺得喺呢一個樂壇裏面，我衷心咁講，聲色藝俱全嘅香港歌手有兩個，一個叫梅艷芳，一個叫鄭秀文。」唱出《唯獨你是不可取替》時安仔又玩改詞，將最後一句「下半生准我留住你」改成「下半生准我留住佢」（指着後台的 Sammi），令全場再度尖叫。
其後安仔即趕返九展出席新城頒獎禮慶功宴，雖然兩邊頻撲兼時間緊逼，但為舊愛演出，安仔可謂義無反顧。問到安仔送花給 Sammi有否擔心現任女友 Michelle（余德琳）呷醋？安仔聞言笑說：「你哋一問我就扯火，佢（指女友）一向好欣賞 Sammi啲歌。」但他卻未有回答是否有介紹女友給 Sammi認識。
安仔透露原先 Sammi提議合唱《會過去的》，但最後還是選了更有深意的《其實你心裡有沒有我》，有指 Sammi以歌向安仔表白？安仔聞言即說：「你哋諗太多。」首場安仔做座上客時， Sammi表白愛情觀後唱出《恰似你的溫柔》，似是向安仔示愛，安仔也認為是外界敏感。
聞復合離座避談
安仔表示原先想送 14支玫瑰給 Sammi，但覺得不好意頭故改送 12支，記者笑言 12支代表「我愛你」，安仔反應甚大說：「吓，我唔知喎。」對於 Sammi剖白表示感情乾涸，安仔出言安慰：「佢想要水源定綠洲都好，佢想要愛情嘅話，可以由尖沙嘴排到去沙頭角。」問到會否重新考慮 Sammi？安仔匆匆拋下一句說：「唔講啦。」便離座避談，兩人由相戀、分手至今 17年關係可謂藕斷絲連。