出枕頭套床單浴簾

[url=http://hk.apple.nextmedia.com/template/apple/art_main.php?iss_id=20090916&sec_id=462&art_id=13213163]http://hk.apple.nextmedia.com/template/apple/art_main.php?iss_id=20090916&sec_id=462&art_id=13213163[/url]

人氣 o靚模周秀娜（ Chrissie）月前推出噴血寫真及性感攬枕橫掃書展及動漫展，爭議勁、迴響大之餘，更迷得電車男暈陀陀，原來她反轉暑假後依然有貨賣。其經理人公司已落實再斬四両，於聖誕節推出印有 Chrissie攞你命造型的枕頭套、床單及被袋，以及僅用肥皂泡遮重要部位的刷牙、洗頭、冲凉三部曲 1:1浴簾。娜姐登堂入室，陪完冲凉又陪瞓，繼續強攻宅男部屋。

o靚模兵團在剛過去的暑假推出寫真正面交鋒，結果 24歲的周秀娜一枝獨秀跑贏九條街，據其經理人公司報稱， Chrissie的寫真集售出約 31,000本，最具爭議性的性感攬枕則賣出約 6,000個，證明她有價有市，難怪她食住條水搶錢，挾攬枕餘威再攻第二波，鐵定在聖誕節推出床上及浴室用品，讓電車男夜夜念奴嬌。

「唔可以迎合全部人」
榮升新一代性感 icon的 Chrissie，早前在寫真中除了三點式大放送，任賞 32D、 23、 32噴血身材外，刷牙刷到成胸泡的誘惑照片更成熱話。儘管外界批評聲音此起彼落，不過 Chrissie繼續懶理，年底推出的產品硬銷「宅男閂埋房門就有 Chrissie在身邊」，產品包括 1:1浴簾，簾上印有僅以肥皂泡遮掩重要部位的 Chrissie刷牙、洗頭和冲凉造型；另外又推出有其性感肖像的枕頭套、床單及被袋。 Chrissie先陪冲凉再陪瞓覺，夠晒貼身兼賣點十足。
Chrissie上次推出攬枕寫真雖然大賣但遭狂插，今次她再下一城仍毋懼非議，前晚她在將軍澳接受訪問時說：「我冇諗咁多，唔驚嘅， just for fun，下下都退後就行唔到向前。個個人諗嘢唔同，我唔做都有好多人做。我唔覺得出呢啲產品有問題，我由始至終都講係畀鍾意我嘅人去買去揀，唔鍾意嘅對我嚟講亦冇所謂。」
不少人曾狠批 Chrissie敗壞社會風氣，教壞細路，她卻氣定神閒地說：「能夠做到全世界都鍾意嘅人最好啦，但幾叻嘅人都做唔到，咁點解唔堅持自己想做嘅嘢？我唔可以迎合全部人 o架，到𠵱家都仲有人鍾意同支持我，已經足夠啦。」
宅男恩物在聖誕節正式出街前， Chrissie一樣有嘢 sell，就是殺入 iPhone世界。未來兩個月內， fans可以用 iPhone下載其寫真集，實行在 iPhone寫真小宇宙中與日本人氣女模道端 Jessica及矢野未希子睇齊。 Chrissie說：「我係 iPhone用家，又喺電話度睇到自己，覺得好得意，我都會 download自己嘅寫真集。」

「我唔識乜嘢係底線」Chrissie近日接 job冇停手，漫遊手機世界後又跳上大銀幕，下月開拍羅守耀的 3D鬼片《怪嬰》（暫名）， 6位數字片酬袋袋平安。片中她飾演佔有慾極強的第三者角色，介入飾演夫婦的黎諾懿和呂慧儀之間，最後更害死呂慧儀腹中塊肉，令呂含寃自殺。問 Chrissie會否擔心角色不討好？她說：「套戲唔係單單講呢樣嘢，主角係個 BB，自己亦乜都要試吓。」她又笑言暫時未知與黎諾懿是否有親熱戲，她說：「我唔識乜嘢係底線，要睇導演點拍，蜻蜓點水得嚟有 power都 OK嘅。」
採訪：葉雪
攝影：葉君海